AFRICAN TAEKWONDO CHAMPIONSHIPS 2022: Senegal na RDC mu biyandikishije ku ikubitiro

Senegal, Repubulika iharanira Demokarasi ya Congo (RDC), ni bimwe mu bihugu byabimburiye ibindi kwandikisha abakinnyi bazitabira Shampiyona Nyafurika ya Taekwondo (African Taekwondo Championships 2022) izabera i Kigali muri Nyakanga uyu mwaka.

Kuwa kane tariki ya 7 Mata 2022 ni bwo Urubuga  rwo kwandikishirizaho abazitabira shampiyona ya Afurika rwafunguwe.

Ku ikubitiro Somalia yahise yandikisha abakinnyi umunani (8) muri Kyorugi (sparring/fighting), Sudani yandikisha abakinnyi batanu (5) bazarushanwa mu myiyereko (Poomsae).

 Usibye aba kandi handikishije abakinnyi Senegal na Repubulika iharanira Demokarasi ya Congo (RDC) mu gihe n’abandi bakiyandikisha, dore ko kwiyandikisha bizarangira kuwa 25 Kamena 2022.

Shampiyona ya Afurika iteganyijwe gutangira kuwa 13 Nyakanga 2022 igasozwa kuwa 17 Nyakanga 2022.

Kuwa 13-14 Nyakanga hazaba amarushanwa muri Poomsae, hanyuma kuwa 16-17 Nyakanga habe amarushanwa muri Kyorugi.

Kugeza ubu Shampiyona Nyafurika ya Taekwondo iheruka yabereye muri Senegal muri Kamana 2021, hakaba hari hitabiriye ibihugu 30 muri 52 bigize Ihuriro Nyafurika rya Taekwondo (African Taekwondo Uninon/ATU), u Rwanda rukaba rutarashoboye kwegukana umudali n’umwe mu bakinnyi batatu bari baruhagarariye.